Соёлын өвийн үндэсний төв нь (цаашид Үндэсний төв гэх) Монгол Улсын соёлын өвийг бүртгэх, судлах, хадгалах, сэргээн засварлах, авран хамгаалах, сурталчлах чиг үүрэг бүхий төрийн өмчит, соёл, эрдэм шинжилгээний байгууллага юм. Энэхүү чиг үүргийнхээ хүрээнд соёлын өвийн улсын нэгдсэн бүртгэл, мэдээллийн санг бүрдүүлж, шат шатны бүртгэл, мэдээллийн санг мэргэжил арга зүй, олон нийтийг соёлын өвийн мэдлэг, боловсрол, мэдээллээр хангаж, соёлын биет өвийг таньж тогтоох, материал бүтцийг шинжлэн судлах, түүх, соёлын дурсгалын хүрээлэн буй орчны хадгалалт хамгаалалт, эрсдэлийн судалгаа, нөхцөл байдлын дүн шинжилгээг хийх, түүхэн дурсгалт барилга, архитектурын дурсгалыг хамгаалах үйл ажиллагааг музей, эрдэм шинжилгээ, судалгаа, мэргэжлийн байгууллагатай хамтран хэрэгжүүлж, археологийн дурсгалаас илэрч олдсон олдвор, эд өлгийн зүйлсийг газар дээр нь болон тусгай лабораторид цэвэрлэх, бэхжүүлэх, музейн үзмэр, хөшөө, чулуун дурсгалыг сэргээн засварлах ажлыг зохион байгуулсаар ирсэн.